الفرق بين عقلية(الطفل الرضيع)و(الشاب

(ما الفرق بين عقلية الطفلالرضيع وعقلية الشاب؟)


* اولا احب اشكر كل اللى فكر او شارك فى ان النساء يبقى ليهم منتدى خاص عشان الستات والبنوتات يتكلموا براحتهم


بدون قيود لأن دة هايفدنى جدا النهاردة


*ثانيا وده الاهم مش عاوزة حد يزعل من اللى هاقولة لان (الاختلاف فى الرأى لايفسد للود قضية) وبعدين انا مش عاوزة أقول
رأيى بس انا عوزاه يكون موضوع للنقاش عشان اعرف انا كدة معقدة ولا ده الطبيعى؟



لاء انا معنديش عقدة لانى باشوف وباسمع كل بنت وباحس انها باتفكر بنفس الطريقة -سواء اخفت او اعلنت -


يابنات لو ده طبيعى تبقى كارثة الموضوع بيتطور والعقد بتتزايد


انا من زمان شوية كنت فاكرة ان موضوع (سى السيد،والراجل لازم كلمته تمشى،ومفيش تناقش،انا موجود.انا أعترض)


موضوع قديم يعنى كان موضة وانتهت لكن اكتشفت انه لسه موجود لحد دلوقت



ليه ليه ليه ليه احساسهم الدائم ان كلامهم هو اللى لازم يكون صح؟ ومينفعش ست ناخد رأيها؟


ومش عاوز تناقش فى الموضوع ,الستات رغايين وكلامهم مابيجبش همه , كلنا بنسمع الكلام دة يوميا ولا لاء ؟


ولو مش هايقوله بصوت بيكون دة احساسه ولا لاء؟ولوسمع كلامك مش هيحسسك انه بيريحك بس هو مش مقتنع


بيحاول ديما يوصلك انه دايما مشغول وبيكبر دماغه ومش فاضى زينا لاشغله ولا مشغله



وفى الأخر يروح الشغل يحط رجل على رجل ويشرب كوباية النسكافيه ويجلس على النت بقمة من الفراغ ولما يرجع البيت ؟


يقول: ااه انا تعباان جدا انتى مش حاسة بية طول اليوم برة البيت فى الشمس والمواصلات والزحمة وانتى قاعدة فى البيت


ماوراكيش حاجة وفى الأخر نسيتى تعملى اللى قولتك عليه لييييه انتى وراكى حاجة؟ بيحسسك ان فى كارثة حصلت
والبيت هايتهد علينا


والست الغلابانة يصعب عليها جوزها


وتبداء فى الأعتزار ,ولو بصبيتى فى الأخر تلاقيه بيعمل بمقولة(خدوهم بالصوت ليغلبوكوا) لحد ماتنسى طلباتك وطلابات البيت


والعيال وتقولى يعينى الراجل مشغول وتعبان من الصبح وطلعان عينه واحتمال تعيطى من التأثر


طبعا كل دة واحنا لسة فى اول نقطة


المهم ندخل على التانية عشان ماخدش من وقتكوا كتير وتلاقيه بيقولك: بتعملى ايه عندك ياهانم سيبانى وقاعدة على


النت ؟ نسيتى جوزك؟ ادخل فى التانية بسرعة قبل ماعمل مشاكل


الحاجة دى مجنانى، اه قبليها انتو مش مستغربين من العنوان هاقول ليكوا انا سميته كدة ليه؟
بصى ياستى النظرية دى والله لو جربتيها هاتريحك اوى فى التعامل مع اى راجل لو عاملتيه على انه طفل


يعنى لما يناديكى ماينفعش تقوليله استنى لحد ماأخلص اللى فى ايدى لازم يلائيكى ادامه فى ثانيتها او كأنك فى الجيش مثلا


ولما يقول عاوز اكل يلاقى الأكل قدامه على طوول وياريت جرى ولما يقول كلمة لازم تسمعيها وتنفزيها فى اللحظة والتو


واهم حاجة باقة ودى بتضحكنى جدا


انه لأتفه الأسباب ممكن يزعل وياخد جنب يعنى يتأمص


وبكدة لازم نعاملهم معاملة الأطفال لما يطلب منك حاجة ماتفكريش ولاتتناقشى معاه كل اللى تعمليه تطبطبى عليه

وتقولى :حاااضر هاعملك اللى انت عاوزه وبكدة هتكسبيه وتلاقيه هاديى

سؤال طب دة كدة يبقى عقله كبير جدا زى ماهو متخيل ؟؟؟؟

لو ركزتى هتلاقى الفرق الوحيد اللى بينه وبين الطفل ان الطفل لما تتأخرى يدخل فى مرحلة البكاء والرجل يدخل فى مرحلة الزعييق

اوعوا تحسبونى باعقدكوا من الجواز انا مابقصدش بكلامى الأزواج بس انا قصدى كل الرجالة طبعا مع اختلاف النسب انا مقطنعة بس لازم تلاقى فيه ولو حاجة من اللى قلته

اه اعزرونى وانا باكتب انحمأت بزيادة واتعصبت فالموضوع قلب كوميدى بس خير انكوا تضحكوا طبعا هتلاقوا شوية مبالغات بس

من غيظى منهم اعزرونى ومانكرش اننا فينا عيوب متلتلة يمكن اكتر منهم وان كلامهم سعات بيكون صح بس على الأقل عيوبنا

مختلفة وبصراحة كدة عارفينها لاكن هما مش مقطنعين اصلا بعيوبهم

انا نفسى ولو واحدة فيكوا تقول انها قابلت راجل

مافيهوش حاجة من دول يمكن تبقى عقدة عندى انا بس اتمنى والله

اسفة على الإطالة وبعتزر بصراحة انا كنت مخنوقة شوية وجت فيكوا

اتمنى ارى ردود تشفي غليلى انا حاسة انكوا مش هاتضحكوا علية وهاتقولوا الحقيقة

هل انا معقدة؟؟؟؟؟؟؟

وبجد مش النظرية دى بتنفع معاهم ؟؟؟؟؟؟

وشكرا لكم لحسن القرائة حتى النهاية